roz-e-avval hi se tafriq ye auqat men hai
koi hai din ke ujale men koi raat men hai
main bhi majmua-e-azdad huun duniya ki tarah
kahin sahra kahin gulzar miri zaat men hai
hai mire gird miri maan ki duaon ka hisar
gham nahin hai koi dushman jo miri ghaat men hai
main tahi-dast huun lekin ye pata hai mujh ko
vo mire naam hai jo chiiz tire haat men hai
daman-e-shab men chamakte hain sitaron ki tarah
aks kis ka ye miri ḳhaak ke zaat men hai
tirgi ḳhauf ki pahlu men basi hai lekin
kuchh umidon ki chamak dil ke mazafat men hai
mil hi ja.egi kahin paanv Tikane ki jagah
ab sitaron ka jahan meri futuhat men hai
miri pasti pe bahut tanz na kar chashm-e-falak
us ko bhi dekh bulandi jo ḳhayalat men hai
ek hi rang men rahti hai tabi.at har dam
farq jaaḌe men na garmi men na barsat men hai
dil larazta hai pas-e-parda na ho zahr koi
kuchh ziyada hi miThas ab ke tiri baat men hai
dekhna vo bhi kahin chhuT na jaa.e ‘mahir’
jo chamakta hua ik rang rivayat men hai
Leave a Reply