Ejaz Gul
phaila ajab ghubar hai a.ina-gah men
mushkil hai ḳhud ko DhunDhna aks-e-tabah men
jal-bujh chuka hai ḳhvahish-e-nakam se vajud
parchha.in phir rahi hai makan-e-siyah men
main vo ajal-nasib ki qatil huun apna-ap
hota huun roz qatl kisi qatl-gah men
rakkha gaya huun izzat-o-tauqir ka asiir
bandha gaya hai sar ko ghurur-e-kulah men
halkan men nahin tiri ḳhatir sar-e-hujum
sab mar rahe hain hasrat-e-yak-do-nigah men
Leave a Reply