Syed Kashif Raza
vo yaad kar bhi raha ho to fa.eda kya hai
ye dil ujaaḌ paḌa hai ise mila kya hai
bahut dinon se ye dil yunhi ro raha hai aur
bata raha hi nahin hai ise hua kya hai
zara si der utarne de apni ankhon men
zara ye dekhne to de ye rasta kya hai
ik aur bhuuk thi jis ne mujhe faqir kiya
vagarna paas tire husn ke siva kya hai
main apne-ap se kam bhi huun aur ziyada bhi
vo janta bhi hai mujh ko to janta kya hai
ye dard-e-ḳhvab hai is ko bhi chakh ke dekh hi luun
pata kahin to chale ḳhvab men maza kya hai
Leave a Reply