dekh qindil ruḳh-e-yar ki janib mat dekh
tez talvar hai talvar ki janib mat dekh
bol kitni hai tire samne qimat meri
chhoḌ bazar ko bazar ki janib mat dekh
dekhna hai to mujhe dekh ki main kaisa huun
mere ujḌe hue ghar-bar ki janib mat dekh
aur baḌh ja.egi tanha.i tujhe kya ma.alum
aisi tanha.i men divar ki janib mat dekh
aage nikla hai to phir aage nikalta chala ja
pichhe haTte hue salar ki janib mat dekh
tu mire samne aaya hai to phir dekh mujhe
meri TuuTi hui talvar ki janib mat dekh
tu kahani ke badalte hue manzar ko samajh
ḳhuun rote hue kirdar ki janib mat dekh
tera dil hi na kahin kaaT ke rakh de ‘az.har’
aankh se girti hui dhaar ki janib mat dekh
Leave a Reply