hosh us ka hai be-ḳhudi us ki
zindagi ki har ik ghaḌi us ki
duur tak malgaja sa sannaTa
aur aahaT kabhi kabhi us ki
ishq mera hai sufiyon jaisa
sirf matlub hai ḳhushi us ki
dil ko honTon se duur rakhta hai
maar Dalegi ḳhamushi us ki
tirgi chha rahi hai har janib
bevafa.i hai shaam si us ki
dekh kar ḳhush-guman hua hai dil
garm-joshi kamal ki us ki
ham-safar jis ka ḳhub-sirat ho
ḳhub-surat hai zindagi us ki
ḳhvab men dil-navaziyan ‘javed’
aur haqiqat hai be-ruḳhi us ki
Leave a Reply