Dida-E-Sang Mein Binai Kahan Se Aae

Muzaffar Warsi

dida-e-sang men bina.i kahan se aa.e

zarf murda ho to sachcha.i kahan se aa.e

pyaar ta.amir ho jab bughz ki buniyadon par

milti nazron men shanasa.i kahan se aa.e

gum hain rangon men ḳhad-o-ḳhal bhi tasviron ke

pas-e-parda ka tamasha.i kahan se aa.e

meri har soch ke raste men khaḌa hai koi

a.ina-ḳhane men tanha.i kahan se aa.e

meri avaz ḳhamoshi ne mujhe lauTa di

mujh men ab jur.at-e-goya.i kahan se aa.e

koi bhi dekhna chahe na kisi ko zinda

ḳhuun ke pyason men masiha.i kahan se aa.e

is qadar shauq dar-amad hai ‘muzaffar’ ham ko

sochte rahte hain rusva.i kahan se aa.e