Ram Riyaz
mujhe kaif-e-hijr aziiz hai tu zar-e-visal sameT le
main jo tera koi gila karun miri kya majal sameT le
mire harf o saut bhi chhin le mire sabr-o-zabt ke saath tu
mira koi maal bura nahin mera saara maal sameT le
ye tamam din ki masafaten ye tamam raat ki afaten
mujhe in dinon se najat de mira ye vabal sameT le
sabhi reza reza inayaten usi ek ki hain rivayaten
vo jo lamha lamha bikher de vo jo saal saal sameT le
tire intizar men is tarah mira ahad-e-shauq guzar gaya
sar-e-sham jaise bisat-e-dil koi ḳhasta-hal sameT le
tire ruḳh pe chand bhi dard hai tira is men kaun sa harj hai
tu agar ye hashiya chhoḌ de to agar ye baal sameT le
ye hamara shauq tha ham ne apne gulon men parinde saja liye
use iḳhtiyar hai ‘ram’ jab bhi vo chahe jaal sameT le
Leave a Reply