ankhon se ik ḳhvab guzarne vaala hai
khiḌki se mahtab guzarne vaala hai
sadiyon ke in ḳhvab-gazida shahron se
mahr-e-alam-tab guzarne vaala hai
jadugar ki qaid men the jab shahzade
qisse ka vo baab guzarne vaala hai
sannaTe ki dahshat baḌhti jaati hai
basti se sailab guzarne vaala hai
dariyaon men ret uḌegi sahra ki
sahra se girdab guzarne vaala hai
maula jaane kab dekhenge ankhon se
jo mausam shadab guzarne vaala hai
hasti ‘amjad’ divane ka ḳhvab sahi
ab to ye bhi ḳhvab guzarne vaala hai
Leave a Reply