bas ek baat yahi sochta huun dilli men
kyon gaanv chhoḌ ke main aa basa huun dilli men
pata karo ki kahan par bhaTak raha hai vo
use kaho main use DhunDhta huun dilli men
har ek shaḳhs yahan ajnabi sa lagta hai
ki bhiiḌ men bhi main tanha khaḌa huun dilli men
tumhare saath ki vo sair yaad aati hai
main tanha jab bhi kabhi ghumta huun dilli men
jo puchhte ho mira kaam to suno tum bhi
main dard-o-gham ki dava bechta huun dilli men
yahan ki ab-o-hava men mujhi ko paoge
main har taraf yahan bikhra paḌa huun dilli men
Leave a Reply