vo kaun hai vo kya hai jo is dil men chhupa hai
jaise ki koi saanp kisi bil men chhupa hai
kyuun dauḌ ke aati hain idhar maujen musalsal
kya kam hai samundar men jo sahil men chhupa hai
ik ruuh bulati hai anasir ke qafas se
par hosh kisi ḳhvab ki mahfil men chhupa hai
siine ko mire sang vo hone nahin deta
kuchh mom ke jaisa bhi isi sil men chhupa hai
main kaise dikha.un ki vo lafzon se bana hai
ik tiir jo is sina-e-bismil men chhupa hai
dhaḌkan ko miri chhu ke parakhta hai palaT kar
ik ḳhauf abhi tak mire qatil men chhupa hai
Leave a Reply