Hakeem Manzoor
hai iztirab har ik rang ko bikharne ka
ki aftab nahin raat bhar Thaharne ka
mujassame ki tarah mausamon ko sahta hai
vo muntazir hai koi hadsa guzarne ka
laTakte sukhte ye naqsh yunhi ro.enge
guzar gaya hai jo mausam tha rang bharne ka
vo aa.ine se agar ho gaya hai be-parva
javaz kya hai use phir kisi se Darne ka
giregi kal bhi yahi dhuup aur yahi shabnam
is asman se nahin aur kuchh utarne ka
ab aag aag hai niile pahaḌ ka manzar
hamen tha shauq bahut us ke paar utarne ka
agarche us ki har ik baat khurduri hai bahut
mujhe pasand hai Dhang us ke baat karne ka
diya hai jis ne bhi chup ka sharap lafzon ko
use ḳhabar hai nahin lafz koi marne ka
hamen ḳhabar hai hamare safar ki ai ‘manzur’
kahenge ham hi na hai rasta sanvarne ka
Leave a Reply