shab to vo yaan se ruuth ke ghar ja ke so rahe
ham tang aa ke jaan se kuchh kha ke so rahe
pahle to kuchh vo aate hi sharma ke so rahe
phir lutf uthe jo ham unhen chaunka ke so rahe
kya main shab-e-visal men ghadiyan gina karun
karvat badal ke kyuun mujhe chaunka ke so rahe
apni kahi na meri suni shaam hi se vo
siina chhupa ke hathon se sharma ke so rahe
kuchh meri jan-kani ka na aaya tumhen khayal
mujh ko na saath sone ko farma ke so rahe
ham baithe ankhen dekhte hain munh ko takte hain
baton men vo to taal ke bahla ke so rahe
mujh ko utha ke nichi nigahon se dekh kar
kuchh dil men soch soch ke pachhta ke so rahe
un se shab-e-visal men hujjat jo badh gai
kuchh dil men soch soch ke pachhta ke so rahe
ham kyuun bataen ham ne bhi ki subh jis tarah
shab tum to jagne ki qasam kha ke so rahe
ai bakht-e-khufta! itni hi tasir tu dikha
us ki gali men paanv mira ja ke so rahe
ta-subh mujh ko maare khushi ke na aai niind
ik aisi baat vo mujhe samjha ke so rahe
ai dil ye kya hua tiri baton ne kya kiya
munh pher ke udhar ko vo tang aa ke so rahe
soton men jaan daal ke angdaiyan na lo
jaage hue ho shab ke jo yaan aa ke so rahe
ik dam ko chaukun shauq se phir souun subh tak
is baat ko zaban hi par la ke so rahe
ye chhed dekho mere na sone ke vaste
andaz ik naya mujhe dikhla ke so rahe
ummid khvab men bhi na yuun dekhne ki thi
jis pyaar se vo shab mujhe lipta ke so rahe
chhoda hai main ne raat na ghar jaane ko unhen
jab kuchh na bas chala to vo jhunjhla ke so rahe
main sone dunga aap ko kab chain se bhala
hai ye to khuub tum mujhe phusla ke so rahe
achchha main paanv dabun pa tum jagte raho
yuun kaun maane hai mujhe bahla ke so rahe
kya sone jagne ka nahin ham ko imtiyaz
karvat badal ke aap jo machla ke so rahe
hai kaun si vo shab jo sahar tak na jaage ham
kis din na aap ghair ke ghar ja ke so rahe
hai bakht-e-khufta aur shab-e-tanhai aur ham
jagen nasib saath jo vo aa ke so rahe
manzur tha ghatana jo ishrat ki raat ka
choti vo apni mujh se hi bandhva ke so rahe
furqat ki shab men jagne se faeda ‘nizam’
behtar hai is se gar koi kuchh kha ke so rahe
Leave a Reply