Abdul Wahab Sukhan
kisi talab men hua main na dar-ba-dar ab ke
raha nigah ka mehvar bas apna ghar ab ke
na jaane kitne hi raste the muntazir lekin
simat ke rah gaya qadmon men hi safar ab ke
ye intizar ki shiddat na thi kabhi pahle
muhit lagta hai sadiyon pe lamha bhar ab ke
bahar-e-lala-o-gul ke qaside khatm hue
khizan ka marsiya padhta hai har shajar ab ke
ye kaisa nasha musallat tha ab ke zehnon par
tabahiyon se rahe sab hi be-khabar ab ke
samar ki parva kiye bin hi ham ne boya hai
zamin-e-khvab pe ummid ka shajar ab ke
ajiib mausam-e-karb-o-bala hai gulshan men
rakha hai ghunchon ne kanton pe apna sar ab ke
ghutan men vaqt ki barud ban gaya huun ‘sukhan’
na phunk de mujhe aa kar koi sharar ab ke
Leave a Reply