Bismil Saeedi
rahne ko ham qafas men rahe ashiyan se duur
lekin chaman men thi ye jagah asman se duur
is qurb se jo sajdon men tujh se hua mujhe
sajde bhi hain muqablatan astan se duur
jitna main ashiyan men qafas se qarib tha
utna hi ab qafas men huun main ashiyan se duur
hasil na jis ki ruuh ko ho qurb-e-mai-kada
vo na-murad rahmat-e-pir-e-mughan se duur
tujh se bhi duur tak koi aisi jagah nahin
mahfil men apni to nazar aa.e jahan se duur
is na-murad se jo tire astan pe hai
achchha hai bad-nasib jo hai astan se duur
ab tak koi bata na saka rah-e-ishq men
manzil kahan se paas hai ‘bismil’ kahan se duur
Leave a Reply