dusra kinara bhi be-vafa kinara hai
ab to Duub jaana hi aḳhiri sahara hai
main utar nahin sakta dusre kinare par
dusra kinara to dusra kinara hai
mujh pe ab mohabbat men zahr piina vajib hai
main ne dil nahin haara hausla bhi haara hai
as.man ki vus.at men jaane ab kahan hoga
vo jo meri qismat ka be-ḳhabar sitara hai
vaqt ki adalat ka faisla yahi hai ab
main bhi ik ḳhasara huun tu bhi ik ḳhasara hai
dusre kinare par ye ḳhabar hui mujh ko
vo to is kahani men tisra kinara hai
main ne tere hisse ke ratjage bhi kaaTe hain
main ne tere hisse ka qarz bhi utara hai
Leave a Reply