thak ke baiThun to mujhe rasta nazar aa.ega
shaam is dasht men guzregi to ghar aa.ega
soch kar meri mohabbat men qadam rakhna tum
is se aage to bahut lamba safar aa.ega
muntazir ankhen kisi taaq men bujh ja.engi
koi hoga hi nahin koi agar aa.ega
siikh ja.unga tire ba.ad bhi jiina lekin
mujh ko ai dost tire hijr se Dar aa.ega
mujh tak aate hue duniya use rokegi bahut
ruk bhi ja.ega kisi raah men par aa.ega
umr ke din to isi aas men kaT jaate hain
raat Dhal ja.egi aur vaqt-e-sahar aa.ega
vaqt ki qaid se azad mah-o-sal se duur
ik zamana hai ki jo bar-e-digar aa.ega
Leave a Reply