Shakeel Badayuni
bekar gai aad tire parda-e-dar ki
allah-re vusat mire aghosh-e-nazar ki
pi shauq se vaaiz are kya baat hai dar ki
dozakh tire qabze men hai jannat tire ghar ki
iman ki daulat se tire husn ka sauda
iman ki daulat hai tiri ek nazar ki
aa jaae tasavvur men koi hashr-ba-daman
phir meri shab-e-gham ko zarurat hai sahar ki
vo samne hain phir bhi unhen dhundh raha huun
akhir koi had bhi hai hijabat-e-nazar ki
tanhai-e-furqat men jo aalam hai idhar ka
hangama-e-mahfil men vo halat hai udhar ki
kuchh sahl na paae hain mohabbat ke maratib
chhani hai bahut khaak tiri rah-guzar ki
Leave a Reply