kaTi patang ki manind Dolte ho tum
mujhe vatan se nikale ga.e lage ho tum
ye aur baat ki ab maslahat-shi.ar hue
qarib mere bhi varna kabhi rahe ho tum
koi rafiq na manzil na koi raḳht-e-safar
ye kis ḳhumar men kis samt ko chale ho tum
faza.en us ki tumhen ab bhi yaad karti hain
ki jis dayar men kuchh din rahe base ho tum
koi ummid na va.ada na hausla koi
yaqin hi nahin aata chale ga.e ho tum
tumhare ruup ka kundan bata raha hai hamen
kisi ki aag men ik umr tak jale ho tum
sukun ka ek bhi lamha nahin nasib ‘anvar’
mira ḳhayal hai mehvar se haT ga.e ho tum
Leave a Reply