musalsal ek hi tasvir chashm-e-tar men rahi
charagh bujh bhi gaya raushni safar men rahi
rah-e-hayat ki har kashmakash pe bhari hai
vo bekali jo tire ahd-e-mukhtasar men rahi
khushi ke daur to mehman the aate jaate rahe
udasi thi ki hamesha hamare ghar men rahi
hamare naam ki haqdar kis tarah thahre
vo zindagi jo musalsal tire asar men rahi
nai udaan ka rasta dikha rahi hai hamen
vo gard pichhle safar ki jo bal-o-par men rahi
Leave a Reply