sanbhalta hai tira dast-e-mo’atabar mujh ko
to kis liye ho koi ḳhauf ya ḳhatar mujh ko
bas ek baar tiri justuju men nikla tha
phir is ke baad na apni mili ḳhabar mujh ko
vo ik makan jo parchha.iyon ka maskan hai
vahi bulata hai muddat se raat bhar mujh ko
khula yahi ki hai vo zard mausamon ka naqib
jo lag raha tha baharon ka nama-bar mujh ko
na jaane kab se khaḌa huun ḳhirad ki sarhad par
hava-e-ku-e-junun aa shikar kar mujh ko
kuchh intizam na.e bal-o-par ka ho jaa.e
digar jahan ka darpesh hai safar mujh ko
sanvarne men laga tha main jis ke sham-o-sahar
samajh raha tha vahi shaḳhs be-hunar mujh ko
hava-e-sub.h hai ya hai shamim-e-jan-afroz
jagane aata hai koi dam-e-sahar mujh ko
ye sochta huun ki sahra ko apna ghar kar luun
ki raas aa na sake apne bam-o-dar mujh ko
nazar jhuka ke mujhe DhunD apne paikar men
talash karta hai kyon tu idhar udhar mujh ko
mujhe talash thi jis ki vahi mila na ‘mujib’
qadam qadam pe mile yuun to dida-var mujh ko
Leave a Reply