Fuzail Jafri
dilon ke aa.ine dhundle paḌe hain
bahut kam log ḳhud ko jante hain
ḳhizan ke ḳhushk patton ko na chheḌo
thake-mande musafir so rahe hain
hamari gham-gusari men shab-e-gham
charagh ahista ahista jale hain
nishan paata nahin koi kisi ka
sabhi ik dusre ko DhunDte hain
bas ik mauj-e-hava-e-gham hai kaafi
irade kya gharaunde ret ke hain
ḳhuda dil ka nagar abad rakhe
hazaron tarah ke gham pal rahe hain
shab-e-mahtab yaden gul-ruḳhon ki
safine mauj-e-ḳhun men tairte hain
Leave a Reply