kuchh aarzi ujale bacha.e hue hain log
muTThi men jugnuon ko chhupa.e hue hain log
us shaḳhs ko to qatl hue der ho ga.i
ab kis liye ye bhiiḌ laga.e hue hain log
barson purane dard na aTkheliyan karen
ab to na.e ghamon ke sata.e hue hain log
ankhen ujaḌ chuki hain magar rang rang ke
ḳhvabon ki ab bhi fasl laga.e hue hain log
kya rah gaya hai shahr men khanDarat ke siva
kya dekhne ko ab yahan aa.e hue hain log
kuchh din se be-dimaghi-e-‘az.har’ hai rang par
basti men us ko ‘mir’ bana.e hue hain log
Leave a Reply