ye to nahin ki un se mohabbat nahin mujhe
pahli si valihana aqidat nahin mujhe
ab main huun aur apni talab apni aarzu
apne siva kisi ki zarurat nahin mujhe
jaise kisi ne daulat-e-kaunain baḳhsh di
gham vo mila ki shikva-e-qismat nahin mujhe
hai tark-e-ma.asiyat men bhi pahlu gunah ka
kya e’tibar-e-va.ada-e-rahmat nahin mujhe
jalva kuchh is ada se dikha kar chale ga.e
shikva to kya hai shukr ki fursat nahin mujhe
bezar huun to apne mazaq-e-vafa se huun
is ke siva kisi se shikayat nahin mujhe
Leave a Reply