Abdul Mannan Samadi
bazm men vo baithta hai jab bhi aage samne
main laraz uthta huun us ki har ada ke samne
tujh ko har dam mangta huun jagta huun raat bhar
aur kaise haath phailaun khuda ke samne
munharif hota gaya har shakhs apni raah se
koi thahra hi nahin us ki sada ke samne
mujh pe hi ilzam rakh kar har taraf rusva kiya
koi chara hi nahin tha be-vafa ke samne
tez andhi thi uda kar le gai mujh ko kahan
ek tinka tha kahan rukta hava ke samne
Leave a Reply