Devmani Pandey
is jahan men pyaar mahke zindagi baaqi rahe
ye dua mango dilon men raushni baaqi rahe
aadmi puura hua to devta ho ja.ega
ye zaruri hai ki us men kuchh kami baaqi rahe
doston se dil ka rishta kaash ho kuchh is tarah
dushmani ke saa.e men bhi dosti baaqi rahe
dil ke angan men ugega ḳhvab ka sabza zarur
shart hai ankhon men apni kuchh nami baaqi rahe
ishq jab kariye kisi se dil men ye jazba bhi ho
laakh hon rusva.iyan par ashiqi baaqi rahe
dil men mere pal rahi hai ye tamanna aaj bhi
ik samundar pi chukun aur tishnagi baaqi rahe
Leave a Reply