Guman Na Kyunki Karun Tujh Pe Dil Churane Ka

guman na kyunki karun tujh pe dil churane ka

jhuka ke aankh sabab kya hai muskurane ka

ye siina hai ye jigar hai ye dil hai bismillah

agar khayal hai talvar azmane ka

kisi ke honth ke milte hi ham tamam hue

maza mila na hamen galiyan bhi khane ka

mujhe ye dard hai malum hukm-e-bulbul bin

na meri khaak pe kar qasd phuul laane ka

kiya farefta kah kah ke hal-e-dil us ko

asar fusun se nahin kuchh kam is fasane ka

ghamon ki gar yahi balidgi hai to akhir

dil-e-girafta nahin siine men samane ka

Leave a Comment