Raunaq Raza
umr bhar pesh-e-nazar mah-e-tamam aate rahe
chand chehre a.ina-ḳhane ke kaam aate rahe
chand qatre bhi na Tapke ḳhvahishon ki ret par
kaise kaise abr the bala-e-bam aate rahe
mere maazi ke ufuq par chand jugnu the ki jo
haal ki tira-shabi men mere kaam aate rahe
main havas ke gird chahat ka hunar banta raha
us ke ḳhat meri vafadari ke naam aate rahe
haa.e vo shirin tamanna aur vo tiflana ḳhu
ham sada jis ke liye ḳhud zer-e-dam aate rahe
tum hisar-e-vaqt men suraj bane baiThe rahe
aur gardish ke liye ḳhud sub.h o shaam aate rahe
umr bhar ḳhvabon ki manzil ka safar jaari raha
zindagi bhar tajrabon ke zaḳhm kaam aate rahe
Leave a Reply