gham-e-mohabbat sata raha hai gham-e-zamana masal raha hai
magar mire din guzar rahe hain magar mira vaqt tal raha hai
vo abr aaya vo rang barse vo kaif jaaga vo jaam khanke
chaman men ye kaun aa gaya hai tamam mausam badal raha hai
miri javani ke garm lamhon pe daal de gesuon ka saaya
ye dopahar kuchh to moatadil ho tamam mahaul jal raha hai
ye bhini bhini si mast khushbu ye halki halki si dil-nashin bu
yahin kahin teri zulf ke paas koi parvana jal raha hai
na dekh o mah-jabin miri samt itni masti-bhari nazar se
mujhe ye mahsus ho raha hai sharab ka daur chal raha hai
‘adam’ kharabat ki sahar hai ki bargah-e-rumuz-e-hasti
idhar bhi suraj nikal raha hai udhar bhi suraj nikal raha hai
Leave a Reply