Mardan Ali Khan Rana
le qaza ehsan tujh par kar chale
ham tire aane se pahle mar chale
kucha-e-janan men jaana hai zarur
chahe aara sar pe ya khanjar chale
bas ye hai ku-e-butan ki sarguzisht
sar pe mere saikdon patthar chale
ku-e-janan ka na paaya kuchh nishan
khizr ke ham-rah ham din bhar chale
paai tere dar pe aa kar zindagi
o masiha kha ke ham thokar chale
dekhiye dekhenge kya roz-e-jaza
yaan bashar aae vahan ba-shar chale
ho khizan kyun-kar na gulshan ki bahar
jab yahan bad-e-saba sar-sar chale
bazm se jaate ho duzdida-nazar
nim-bismil kar chale kya kar chale
qaul-e-vaiz ne na kuchh tasir ki
kushta-e-kakul pe kab mantar chale
khuun tiri tirchhi nigahon ne kiya
laakh khanjar ek kushte par chale
farsh par hai yuun khiraman rashk-e-mah
arsh par jaise koi akhtar chale
kab hui sauda-e-mizhgan se shifa
nashtaron par saikdon nashtar chale
Leave a Reply