Poet
daagh baiana husn ka na hua
khote damon moamla na hua
dil mukaddar raha safa na hua
faiz aina-ruon ka na hua
kuchh na kaam aae daagh ki buuti
qalb tanba raha tila na hua
dard-mandan-e-khal kahte hain
goliyan khain faeda na hua
dil khayalon se paemal raha
sabza-e-rah-guzar hara na hua
aae fasl-e-chaman ki iid aae
ghunche chatke ki shadiyana hua
har kisi zulf men raha uljha
dam-e-ulfat se dil riha na hua
na khatakte kisi ke ankhon men
ye ghubar apna tutiya na hua
mere aage vo baithe ghair ke paas
paas mera unhen zara na hua
dil ne aise uthae ranj-o-taab
phir mohabbat ka hausla na hua
jab kisi ki nazar pade rukh par
khal-e-mushkin siyah daana hua
dekhi kaifiyyat-e-bahar-o-khizan
main do-rangi se ashna na hua
dil shagufta hua na phulon se
koi kanta girah-kusha na hua
ghar bana kar yahan ye tang aaya
uqda-e-khatir ashiyana hua
rashk ka hai maaal be-rangi
sabza pis kar kabhi hina na hua
‘bahr’ dil soch kar use dena
khud-gharaz ashna hua na hua
Leave a Reply