jis se bezar rahe the vahi dar kya kuchh hai
ghar ki duuri ne ye samjhaya ki ghar kya kuchh hai
shukr karta huun ḳhuda ne mujhe mahsud kiya
ab main samjha ki mire paas hunar kya kuchh hai
rat-bhar jaag ke kaaTe to koi meri tarah
ḳhud-ba-ḳhud samjhega vo pichhla pahar kya kuchh hai
koi jhonka nahin sanka chaman-e-rafta se
koi sun-gun nahin yaron ki ḳhabar kya kuchh hai
nigaran su-e-zamin dida-e-aflak hai aaj
jada-e-vaqt pe miTTi ka safar kya kuchh hai
jaise qismat ki lakiron pe hamen chalna hai
kaun samjhega teri rahguzar kya kuchh hai
varaq-e-gul pe hai tahrir si donon janib
ham ne kya dekha udhar jaane udhar kya kuchh hai
chal paḌe sub.h-e-azal ‘shaz’ ishare pe tire
ham ne socha hi nahin raḳht-e-safar kya kuchh hai
Leave a Reply