Main Akela Hun Yahan Mere Siwa Koi Nahin

maiñ akelā huuñ yahāñ mere sivā koī nahīñ

chal rahā huuñ aur merā naqsh-e-pā koī nahīñ

zehn ke tārīk goshoñ se uThī thī ik sadā

maiñ ne pūchhā kaun hai us ne kahā koī nahīñ

dekh kar har ek shai kā faisla karte haiñ log

aañkh kī putlī meñ kyā hai dekhtā koī nahīñ

kis ko pahchānūñ ki har pahchān mushkil ho ga.ī

ḳhud-numā sab log haiñ aur rūnumā koī nahīñ

naqsh-e-hairat ban ga.ī duniyā sitāroñ kī tarah

sab kī sab āñkheñ khulī haiñ jāgtā koī nahīñ

ghar meñ ye mānūs sī ḳhushbū kahāñ se aa ga.ī

is ḳharābe meñ agar aayā gayā koī nahīñ

paikar-e-gul āsmānoñ ke liye betāb hai

ḳhaak kahtī hai ki mujh sā dūsrā koī nahīñ

umr bhar kī talḳhiyāñ de kar vo ruḳhsat ho gayā

aaj ke din ke sivā roz-e-jazā koī nahīñ

Leave a Comment