Andaz Nirala Hai Ada Aur Hi Kuchh Hai

andaz nirala hai ada aur hi kuchh hai

ye husn nahin nam-e-ḳhuda aur hi kuchh hai

kahte ho ham ab ghair ko aane nahin dete

ya-rab yahi sach ho pe suna aur hi kuchh hai

parda na rakha tere lab-e-ruh-faza ne

ham jante the ab-e-baqa aur hi kuchh hai

jo main ne kaha tha vo bigaḌne ki na thi baat

kahta huun ki qasid ne kaha aur hi kuchh hai

hamdam yahi janan ki juda.i ka hai rona

kahte hain jise marg vo kya aur hi kuchh hai

iisa se kaho murda-e-sad-sala jila len

bimar-e-mohabbat ki dava aur hi kuchh hai

farhad-e-havas-pesha ne bhi di to sahi jaan

par sheva-e-arbab-e-vafa aur hi kuchh hai

tum husn ki ḳhairat men kya dete ho laao

har-chand tamanna-e-gada aur hi kuchh hai

ham zohd-o-ibadat ke bhi munkir nahin ‘nazim’

par qa.eda-e-faqr-o-fana aur hi kuchh hai