Shagufta Shafiq
dil se paigham-e-ulfat miTane ke baad
kho diya phir tujhe ham ne paane ke baad
vo sulagte rahe dil jalane ke baad
ham to phir hans paḌe TuuT jaane ke baad
ab to raste bhi apne juda ho ga.e
baat banti nahin choT khane ke baad
jaa.en jaa.en hamen kuchh nahin vasta
dil-lagi na karen dil jalane ke baad
ham ko is se kahan koi inkar hai
ghar bana hai makan tere jaane ke baad
janti huun ki us ka hai sheva yahi
vo rula.ega ham ko hansane ke baad
shadman vo nazar aa rahe the bahut
kaifiyat apni gham ki chhupa ne ke baad
sochti huun ‘shagufta’ ajab baat hai
ham ne paaya hai us ko ganvane ke baad
Leave a Reply