Dariya-E-Ashk Chashm Se Jis Aan Bah Gaya

dariya-e-ashk chashm se jis aan bah gaya

sun lijiyo ki arsh ka aivan bah gaya

bal-be-gudaz-e-ishq ki khuun ho ke dil ke saath

siine se tere tiir ka paikan bah gaya

zahid sharab piine se kafir hua main kyuun

kya Dedh chullu paani men iman bah gaya

hai mauj-e-bahr-e-ishq vo tufan ki al-hafiz

bechara musht-e-khak tha insan bah gaya

dariya-e-ashk se dam-e-tahrir hal-e-dil

kashti ki tarah mera qalam-dan bah gaya

ye roe phuut phuut ke paani ke aable

naala sa ek su-e-bayaban bah gaya

tha tu baha men besh par us lab ke samne

sab mol tera lal-e-badakhshan bah gaya

kashti savar-e-umr huun bahr-e-fana men ‘zauq’

jis dam baha ke le gaya tufan bah gaya

tha ‘zauq’ pahle dehli men punjab ka sa husn

par ab vo paani kahte hain multan bah gaya

Leave a Comment