Ek Ke Ghar Ki Khidmat Ki Aur Ek Ke dil Se Mohabbat Ki

Zehra Nigaah

ek ke ghar ki khidmat ki aur ek ke dil se mohabbat ki

donon farz nibha kar us ne saari umr ibadat ki

dast-e-talab kuchh aur badhate haf-iqlim bhi mil jaate

ham ne to kuchh tute-phute jumlon hi pe qanaat ki

shohrat ke gahre dariya men duube to phir ubhre nahin

jin logon ko apna samjha jin logon se mohabbat ki

ek doraha aisa aaya donon tuut ke gir jaate

bachchon ke hathon ne sambhala budhon hi ne hifazat ki

jama-e-ulfat bunte aae rishton ke dhagon se ham

umr ki qainchi kaat gai ab kaahe ko itni mehnat ki