Akhtar Ansari
pur-kaif ziyaen hoti hain pur-nur ujale hote hain
jab ḳhak-basar dil hota hai aur arsh pe naale hote hain
hanste hain dahan-e-zaḳhm se ham gaate hain fughan ke barbat par
ashufta-saron ki duniya ke sab dhang nirale hote hain
kya qahr barasta hai dil par savan ki shabon men kya kahiye
kuchh dard ki phuvaren hoti hain kuchh yaas ke jhale hote hain
in ujḌe hue armanon ko kis shauq se dil ne sincha tha
barbad magar hote hain vahi jo naam ke paale hote hain
chahat ke sitam bardasht karen mar mar ke jien aur mar na saken
kya janiye kis miTTi ke bane ye chahne vaale hote hain
dil tang na ho ai rah-rav-e-gham kanTon ke liye to kam se kam
manind-e-naved-e-abr-e-karam ye paanv ke chhale hote hain
uf-re vo nazakat lahje ki baten jo nikalti hain munh se
ya chand ki kirnen hoti hain ya barf ke gaale hote hain
ye dard-e-junun ye soz-e-jigar in kaifiyaton ke gird ‘aḳhtar’
tasḳhir ke halqe hon ki na hon taqdis ke haale hote hain
Leave a Reply