Shohrat Bukhari
in ko dekha tha kahin yaad nahin
asman tha ki zamin yaad nahin
chand taron ki mundi thiin ankhen
tha kahan mehr-e-mubin yaad nahin
naghma hi naghma tha ya rang hi rang
ham makan the ki makin yaad nahin
ahd-o-paiman ki jhamakti sham.en
kis tarah Duub ga.iin yaad nahin
ab ye aalam hai ki ḳhud ham ko bhi
kyuun hue barq-nashin yaad nahin
maut pyari jo laga karti hai
is qadar kyuun hai ghamin yaad nahin
ras bhari sub.hen nashili shamen
kis ke hamrah ga.iin yaad nahin
raakh ke Dher hain charon janib
bastiyan kaise luTin yaad nahin
jin ki ta.abir hain aansu ‘shohrat’
aaj vo ḳhvab-e-hasin yaad nahin
Leave a Reply