Anjum Saleemi
saḳht mushkil men kiya hijr ne asan mujhe
dusra ishq hua pahle ke dauran mujhe
tere andar ki udasi ke mushabah huun main
ḳhal-o-ḳhad se nahin avaz se pahchan mujhe
ajnabi shahr men ik luqme ko tarsa hua main
mezban jismon ne samjha nahin mehman mujhe
ek hi shakl ke sab chehre the lekin phir bhi
ek chehre ne to behad kiya hairan mujhe
main mohabbat bhi mohabbat ke evaz deta huun
phir bhi ho jaata hai is kaam men nuqsan mujhe
bhule-bisre kisi naghme ki si shadab avaz
raat kanon men paḌi kar ga.i sunsan mujhe
jaane kab saunp duun miTTi ko ye miTTi ka qafas
jaane kab dena paḌe ruuh ka tavan mujhe
Leave a Reply