bhuke jismon ki ḳhvahishon ke liye
ham mile the zaruraton ke liye
jhank lena bura nahin hota
achchha hota hai khiḌkiyon ke liye
chaar hisson men baT ke rah jaana
kitna mushkil hai anganon ke liye
meri har nazm laḌkiyon pe nisar
mera har sher auraton ke liye
bhiig jaana mujhe bhi aata hai
ek elaan barishon ke liye
dhobiyon ke liye bahut adab
taliyan us ke darziyon ke liye
un dukanon men dastiyab kahan
lipstick aap ke labon ke liye
vo mujhe is tarah zaruri hai
ghanTiyan jaise mandiron ke liye
us ka chehra ghazal ki achchhi kitab
us ki ankhen samundaron ke liye
Leave a Reply