Ayaz Rasool Nazki
shab-e-firaq men mire vo bal-o-par katar gaya
parind us ki yaad ka na.i uḌaan bhar gaya
yahan pe ḳhuun bah gaya vahan pe laash gir paḌi
na jaane kaun shaḳhs tha safar tamam kar gaya
kisi ki niind TuTti koi to raat jagta
isi nagar men raat ko kisi ka ḳhvab mar gaya
na ta.eron ka ghol hi hamari chhat pe aa ruka
na apne ghar ke samne vo karvan Thahar gaya
vo dopahar guzar ga.i vo sar ke baal jhaḌ ga.e
‘ayaz’ itni der men hamara din guzar gaya
Leave a Reply