Faisal Nadeem Faisal
kuchh aisa rabt musalsal raha shu.ur se bhi
ki ḳhauf aane laga ishq ke vafur se bhi
vo shash-jahat se yaksan dikha.i deta hai
use qarib se dekha hai aur duur se bhi
hamara ishq haqiqat men ghar-e-saur-o-hira
agarche ḳhaas aqidat hamen hai tuur se bhi
suna hai ḳhaas ta.alluq hai ḳharjiyat ka
hamari zaat ke kuchh daḳhli umuur se bhi
tabhi to zehn pe haavi hai ishq-e-sahra.i
azal se dil ke marasim rahe khajur se bhi
ye aur baat hai maano ki iḳhtilaf karo
nishaniyan to hazaron milin zabur se bhi
lahu men raqs-kunan ishq hai mire ‘faisal’
juḌa hua hai koi silsila qusur se bhi
Leave a Reply