Be-Khabar-E-Hayat Tha Gham Ne Mujhe Jaga Diya

Jigar Barelvi

be-khabar-e-hayat tha gham ne mujhe jaga diya

ziist ka raaz khol kar maut ka aasra diya

zulf-e-siyah ki yaad men ḳhauf-e-pas-e-fana kahan

tul-e-shab-e-firaq ne sub.h ka gham miTa diya

maut kahin nahin hamen aur kahan nahin hai maut

kis ne bana ke saḳht-jan siine men dil bana diya

talḳh to tha gham-e-hayat itna na talḳh tha magar

puchh ke tum ne hal-e-dil zahr mujhe pila diya

aa ke palaT gaya koi aur na hamen ḳhabar hui

kaif-e-ummid-e-did ne shaam hi se sula diya

gham-kada-e-hayat men aah main vo charagh huun

sub.h hui jala diya shaam hui bujha diya

haa.e vo dard kya hua jis se thi zindagi miri

ḳhud hi miTa nahin hai dil dil ne mujhe miTa diya

haif ki be-kasi ki sharm aaj ‘jigar’ na rah saki

ujḌe hue mazar par kis ne diya jala diya