ham jahan rahte hain ḳhvabon ka nagar hai koi
is ḳharabe men na divar na dar hai koi
ja basa tha jo kisi hijr ke sahra men kabhi
ai havao kaho is dil ki ḳhabar hai koi
surat-e-mauj-e-saba log idhar se guzre
ye to anjani havaon ki dagar hai koi
hijr-e-didar bhi mahrumi-e-didar bhi hijr
jo kabhi ḳhatm na ho aisa safar hai koi
main ki andar se pighalta hi chala jaata huun
mere yaḳh-basta badan men bhi sharar hai koi
ye faza raas nahin dasht-mizajon ke liye
is saman-zar men patthar hai na sar hai koi
jism aur jaan ka ye azar ye mahshar ‘akbar’
kisi andesha-e-batin ka asar hai koi
Leave a Reply