Ba-Rah-E-Rast Nahin Phir Bhi Rabta Sa Hai

ba-rāh-e-rāst nahīñ phir bhī rābta sā hai

vo jaise yād-e-mazāfāt meñ chhupā sā hai

kabhī talāsh kiyā to vahīñ milā hai vo

nafas kī āmad-o-shud meñ jahāñ ḳhalā sā hai

ye taare kis liye āñhkeñ bichhā.e baiThe haiñ

hameñ to jāgte rahne kā āriza sā hai

ye kā.enāt agar vaisī ho to kyā hogā

hamāre zehn meñ ḳhāka jo ik banā sā hai

zamīñ madār pe raqsāñ hai sub.h o shaam mudām

kure ke chaar taraf ik muhāsara sā hai

Leave a Comment