manus fitratan hain gham-e-ashiqi se ham
phir kyuun na tere naaz uTha.en ḳhushi se ham
jab se yaqin hua hai vahi karsaz hain
ab apna haal kahte nahin har kisi se ham
ḳhamosh zindagi bhi dalil-e-bahar hai
ye dars le rahe hain chaman men kali se ham
ye aur baat hai ki hamen kuchh gila bhi hai
munkir nahin magar tiri dariya-dili se ham
dil-soz-o-dil-ḳharash hai ye jada-e-hayat
lekin guzar rahe hain baḌi sadgi se ham
ye fikr ye ḳhayal ‘aziz’ aap ka na ho
kuchh sher sun rahe the abhi ‘varsi’ se ham
Leave a Reply