Murtaza Barlas
niind bhi tere bina ab to saza lagti hai
chaunk paḌta huun agar aankh zara lagti hai
fasla qurb bana qurb bhi aisa ki mujhe
dil ki dhaḌkan tire qadmon ki sada lagti hai
dushman-e-jan hi sahi dost samajhta huun use
bad-dua jis ki mujhe ban ke dua lagti hai
ḳhud agar naam luun tera to larazta hai badan
ghair gar baat kare choT siva lagti hai
aise mahbas men janm apna hua hai ki mujhe
har dariche se baḌi sard hava lagti hai
tanz-amez nahin hai mira andaz-e-suḳhan
talḳh be-shak hai magar baat juda lagti hai
Leave a Reply