qurbaten nahin rakkhin fasla nahin rakkha
ek baar bichhḌe to rabta nahin rakkha
itna to samajhte the ham bhi us ki majburi
intizar tha lekin dar khula nahin rakkha
ham ko apne baare men ḳhush-gumaniyan kyuun hon
ham ne ru-ba-ru apne a.ina nahin rakkha
jab pata chala is men sirf ḳhuun jalta hai
us ke ba.ad sochon ka silsila nahin rakkha
har dafa vahi chehre barha vahi baten
in purani yadon men kuchh naya nahin rakha
apne apne raste par sab nikal ga.e ik din
saath chalne valon ne hausla nahin rakkha
jab hava ke ruḳh par hi kashtiyon ko bahna tha
tum ne badbanon ko kyuun khula nahin rakkha
ham ko apne baare men harf harf likhna tha
dastan lambi thi hashiya nahin rakkha
Leave a Reply