Muzaffar Iraj
vo bahut be-qarar hai shayad
us ko bhi intizar hai shayad
nafraten sar se paanv tak dekhen
dil men thoḌa sa pyaar hai shayad
kar ke tai marhale udaas tha vo
jeb men us ki haar hai shayad
zindagi aḳhiri Thikane par
qabil-e-e’tibar hai shayad
gham bhi phal-phulta hai aa.e din
shajar-e-saya-dar hai shayad
mere rone pe koi baat na ki
aaj vo sogvar hai shayad
guftugu men na mujh se jiit saka
is liye sharmsar hai shayad
jis ko dekhun vo girta paḌta hai
har taraf intishar hai shayad
kaj-kulahi tumhari ‘iraj’ ji
ba.is-e-iftiḳhar hai shayad
Leave a Reply