Nae Khake

nuqush-e-hasrat mita ke uthna, khushi ka parcham uda ke uthna

mila ke sar baithna mubarak tarana-e-fath ga ke uthna

ye guftugu guftugu nahin hai bigadne banne ka marhala hai

dhadak raha hai faza ka siina ki zindagi ka muamla hai

khizan rahe ya bahar aae tumhare hathon men faisla hai

na chain be-tab bijliyon ko na mutmain karvan-e-shabnam

kabhi shagufon ke garm tevar kabhi gulon ka mizaj barham

shagufa o gul ke is tasadum men gulsitan ban gaya jahannam

saja len sab apni apni jannat ab aise khake bana ke uthna

khazana-e-rang-o-nur tarik rahguzaron men lut raha hai

urus-e-gul ka ghurur-e-ismat siyahkaron men lut raha hai

tamam sarmaya-e-latafat zalil kharon men lut raha hai

ghuti ghuti hain numu ki sansen chhuti chhuti nabz-e-gulistan hai

hain gursana phul, tishna ghunche, rukhon pe zardi labon pe jaan hai

asiir hain ham-safir jab se khizan chaman men ravan-davan hai

is intishar-e-chaman ki saugand bab-e-zindan hila ke uthna

hayat-e-giti ki aaj badli hui nigahen hain inqilabi

ufuq se kirnen utar rahi hain bikherti nur-e-kamyabi

nai sahar chahti hai khvabon ki bazm men izn-e-baryabi

ye tirgi ka hujum kab tak ye yaas ka azhdaham kab tak

nifaq o ghaflat ki aad le kar jiyega murda nizam kab tak

rahenge hindi asiir kab tak rahega bharat ghulam kab tak

gale ka tauq aa rahe qadam par kuchh is tarah tilmila ke uthna